
ISikole sezeMfundo Besivakashelwe Yizifundiswa zase-Brazil
Click here for English version
IQoqo leSikole sezeMfundo Ethinta Umphakathi besivakashelwe yizifundiswa ezimbili zase-Brazil, uSolwazi Solange Locatelli (wase-Federal University of ABC) noSolwazi Leonardo Testoni (wase-Federal University of São Paulo) ekhempasini yase-Edgewood.
Lokhu kuvakasha bekuhlelwe wuMholi weziFundo Ezindabeni Ezithinta Umphakathi, uSolwazi Angela James, kanti besixhaswe ngezimali wuhulumeni wase-Brazil.
Umphumela walokhu kuvakasha kube wukubambisana nesivumelwano sohlaka sokuthuthukisa lezi zikhungo zontathu ngokwesayensi. Lokhu kuzokhuthaza ukwabelana ngolwazi nangokwenza okuthinta izinto ezihlukile zemfundo. Kuzona kukhona izidingo zamasiko nezikhethekile, amaqhinga okufundisa nokufunda kwezemfundo nokubheka izindlela zokufunda nokufundisa ezigxile ekucwaningeni esigabeni esiyisisekelo, ulwazi lwencwadi nolokwenza, impumelelo, izinselelo nokwehluleka.
U-James, ngokubambisana nabacwaningi base-Brazil kwiMfundo yeSayensi, ubehlele isigcawu sokucijana ngolwazi esibizwa ngokuthi Inquiry-based learning: principles and applications. Lesi sigcawu besigxile kothisha beSigaba Esiyisisekelo kanti besihlose ukuthuthukisa ulwazi lokufunda ngokucwaninga oluthathwa njengento emqoka ekufundiseni nasekufundeni isayensi.
‘Indlela yokufunda egxile ocwaningweni inamandla amakhulu okufundisa njengoba ibeka umfundi eqhulwini lokufunda kanti ithuthukisa amakhono abalulekile amaningi okufunda isayensi,’ kusho u-James. ‘Izinto eziphakanyiswayo zihlose ukuxukuza izitshudeni ugebhezi ukuxazulula izinkinga, ukubumba nokwenza imibuzo edinga ukuphendulwa wucwaningo, ukufinyelela eziphethweni zocwaningo, ukubumba indlela yemibuzo ngaphezu kokuxhumana nabalingani ngolwazi olusha.’
Kulesi sithangami bekukhona nokubheka indlela othisha akade bebambe iqhaza abenza ngayo nokubheka ngezindlela zokufundisa.
U-Testoni uthe: ‘Bekuyinto emnandi ukuhlangana nabantu nolwazi okusha. Kube yintokozo ukufundisa nabafundisi.’ U-Locatelli uphawule wathi: ‘Bekuyithuba lokuhlangana nabantu abasha nesiko labo. Ukuhlanganyela ekutholeni ulwazi olusha kusikhuthaze ukuthi sifunde izinto ezinthsa. Kushintshe ukuhlala kwethu eThekwini kwaba yinto emnandi yokubheka ukufundisa isayensi emhlabeni wesimanje.’
Amagama: ngu-Melissa Mungroo
Isithombe: Sithunyelwe